Friday, October 1, 2021

Збор два за стрипот

Збор два за стрипот

Велат дека вистинската љубов е секогаш тажна и дека сите љубовни приказни се напишани во нечие скршено срце. Вистина или не, за жал, случајот со оваа приказна е токму таков. Нејзиниот зародиш настана поради еден вистинит настан, кој што е опишан на самиот крај од стрипот. Истиот тој настан, во налетот на големите очекувања и на прагот на разочарувањето, иронично послужи како инспирација за приказнава. А во миговите кога сеќавањата за тој настан полека преминуваа во заборав, сценариото веќе беше готово.

Творештвото на Кирси Салонен со голем интерес го следам веќе пет години. Имагинацијата која што извира од секоја нејзина слика, никого не може да го остави рамнодушен. Уште додека го пишував сценариото за стрипот, знаев дека личноста која што најдобро би можела да го наслика и долови е никој друг туку таа. Кога започнавме да ја договаравме соработката истово ѝ го кажав и нејзе, дури и Леонардо да Винчи да се понудеше за илустратор на стрипот јас не би се согласил пред да слушнам што таа има да каже. За среќа нејзиниот одговор беше потврден.

Кирси на приказната ѝ даде надреален уметнички печат и со својот талент и вештини од пишаните зборовите создаде вистинска визуелна поезија. Секој панел од стрипот кој што таа го наслика не е само следење на општата приказна туку и приказна сама по себе. Секој од нив гласно говори со илјада зборови и ни открива низа на имагинативни светови и реални емоции. Стрипот е летериран и на македонски и на англиски јазик, а за проверката на англиската верзија, како и за корекциите, заслужна е професионалната лекторка Ирена Јурчева.

Александар Стеванов

Wednesday, November 28, 2018

Македонскиот стрип во изданијата на новосадски „Дневник“

Во книгата „Македонскиот стрип во изданијата на новосадски ’Дневник‘“, како што впрочем открива самиот нејзин наслов, се опфатени стриповите на македонски автори објавени во мегапопуларните изданија на издавачкиот гигант „Дневник“ од Нови Сад, а воедно проанализирано е и културолошкото влијание кое што тие го имаат во Македонија и тоа долги години по нивното згаснување.
 
https://kupikniga.mk/product/makedonskiot-strip-vo-izdanijata-na-novosadski-dnevnik/

Оваа монографската публикација, на авторите Александар Стеванов, Дарко Богданов и Сашо Гачев, е составена од две главни целини, односно поглавја, во кои се пренесени стотици цитати дел од кои ексклузивно земени, а за полесна навигација содржи и индекс. Освен историјатот и фактографијата на објавените стрипови, истите преку 10 рецензии детално се разработени од визуелен и драматуршки аспект, а претставени се и насловните страници на повеќето од нив, како и некои од најрепрезентативните во нив цртежи.


 

Книгите посветени на македонската стрип-историја се неверојатно малку на број и во последниве речиси триесет години се објавени само две такви. Меѓу другото, токму затоа оваа публикација која изнесува на виделина некои досега непознати настани од македонското стриповско минато, претставува храбар чекор во насока кон надминување на таа ситуација и подигање барем за едно скалило повисоко на општествениот статус кој го има стрип-уметноста во Македонија.

Tuesday, June 12, 2018

„Македонскиот стрип во изданијата на новосадски ’Дневник‘“, промоција во Виница

На 12 јуни, со почеток во 20:00 часот, во Домот на култура „Тошо Арсов“ во Виница ќе биде промовирана книгата „Македонскиот стрип во изданијата на новосадски ’Дневник‘“ на авторите Александар Стеванов, Дарко Богданов и Сашо Гачев.



Самото издание, како што може да се претпостави и од насловот, ги обработува стриповите кои се создадени од македонски стрип-автори, а кои се објавени во едни од легендарните и условно кажано најпопуларни стрип-едиции во поранешна Југославија – „Лунов магнус стрип“ и „Стрип забавник“. Имено, во текот на 80-тите години на минатиот век, македонските цртачи Љубомир Филиповски и Ласко Џуровски биле ангажирани од издавачот „Дневник“ од Нови Сад, за изработка на неколку стрипови, и во книгата на лесно читлив и динамичен начин се опишани околностите кои довеле до создавањето на тие стрипови, процесот на изработка и соработката со сценаристот Миодраг Милановиќ, како и значењето и белегот што го имаат оставено гледано од денешна гледна точка.


За таа цел, самата книга исто така изобилува со ексклузивни изјави од значителен број автори кои работеле на изданијата во истиот тој период, уредници и издавачи, како и од голем дел актуелни македонски и балкански стрип-автори кои творат и издаваат стрипови во моментов. Секако, за целата слика да биде комплетна до крај, исто така се вклучени и детални рецензии на самите стрипови, како и визуелен приказ на насловни страници, одделни кадри и цртежи.


Ова издание е посветено на легендарниот македонски стрип-автор Љубомир Филиповски, кој е еден од најдобрите и најплодни стрип-професионалци во целокупната македонска стрип-историја, и чии стрипови се предмет на обработка во „Македонскиот стрип во изданијата на новосадски ’Дневник‘“. Воедно, со оглед дека е само трета книга од ваков вид и за ваква тематика во целокупната издавачка историја на македонската литература, навистина треба да претставува поттик и мотивација за збогатување на изданија посветени на деветтата уметност, уметност која е можеби најмаргинализирана од историографска и теоретска гледна точка кај нас.